அமெரிக்காவுடன் இணைந்து செயற்படத் தயார்: சீன ஜனாதிபதி அறிவிப்பு

சர்வதேச சவால்களை எதிர்கொள்ள அமெரிக்காவுடன் இணைந்து செயல்பட தயாராக இருப்பதாக சீன ஜனாதிபதி ஷி ஜின்பிங் தெரிவித்துள்ளார்.

அமெரிக்கா சீனா இடையிலான உறவு எப்போதும் ஒருவித இடைவெளியில் நீடித்து வருவது வழக்கம். இதற்கு முக்கிய காரணமாக சீனாவின் அதிவேக பொருளாதார வளர்ச்சி  பார்க்கப்படுகிறது.

இந்நிலையில் கருத்து வேறுபாடுகளை களைந்து சர்வதேச சவால்களை எதிர்கொள்வதற்காக அமெரிக்காவுடன் இணைந்து செயல்பட தயார் என சீன ஜனாதிபதி ஷி ஜின்பிங் தெரிவித்துள்ளார்.

இது தொடர்பாக சீன தேசிய குழுவுக்கு எழுதியுள்ள கடிதத்தில், தற்போதைய உலகிற்கு அமெரிக்காவும், சீனாவும் இணைந்து சரியான பாதையை அமைப்பது முக்கியமான ஒன்றாகும்.

கொள்கைகளின் அடிப்படையில் சம ஒத்துழைப்பு, பரஸ்பர மரியாதை ஆகியவற்றை கொண்டு இரு நாடுகளுக்கும் இடையே நிலையான உறவு கட்டமைக்கப்பட வேண்டும் என்று ஷி ஜின்பிங் தெரிவித்துள்ளார்.

சீன வெளியுறவு அமைச்சர் வாங் இந்த வார இறுதியில் அமெரிக்காவுக்கு சுற்றுப்பயணம் மேற்கொள்ள உள்ள நிலையில், சீன ஜனாதிபதி ஜின்பிங் இவ்வாறு கடிதம் எழுதியிருப்பது குறிப்பிடத்தக்கது.